ಅಲಿಬಾಬಾನ ಗುಹೆಯೊಳಗೆ

ಅಲಿಬಾಬಾನ ಗುಹೆಯೊಳಗೆ

ದಿಕ್ಕು ದಿಕ್ಕಿಗೂ ಅನುರಣಿಸುತಿದೆ

ಆಕಳಿಸುವ ಜಗದ ನೆತ್ತಿಯ 

ಮೇಲೆ ಕುಕ್ಕಿದಂತೆ

ಜ್ಯೋತಿ ಹಚ್ಚಿಟ್ಟ ಮಹಾಮನೆಯೆ ಜಗುಲಿಯೆಲ್ಲಿ

ಸಿರಿ ತುಂಬಿದ ಅರಮನೆಗಳೇ ಎಲ್ಲ ಇಲ್ಲಿ

ಗುಹೆಗಳ ಒಳ ಹೊಕ್ಕು ಬಾಚಿಕೊಂಡ

ಭೋಗದ ಚೀಲಗಳೇ ಬೆನ್ನ ಮೇಲೆ

ಅಲಿಬಾಬಾಗಳ ಕಣ್ಣುಗಳ ಭಿತ್ತಿಯೊಳಗೆ

ಮುತ್ತು ರತ್ನ ಹವಳ ಸುವರ್ಣ

ಮಹಾಮಾಲೆ

ಶರಣ ಪ್ರಮಥಂಗಳ ಮಾತು 

ಮಥನ ಅನುಭಾವದ ನವನೀತವೆತ್ತಣ

ದಾಸಯ್ಯರು ತೋರಿದ ಮಧುಸೂದನನ 

ಕೊಳಲಗಾನವೆತ್ತಣ

ಮುಕ್ತಿಯ ಪದಮಾಲಿಕೆ

ಶರೀಫರ ತಂಬೂರಿಯ ನಾದದೀಪಿಕೆ

ಮರೆತು ಹೋಗಿ ಹಾದಿ ತಪ್ಪಿದವರು

ಚಿಟ್ಟೆಯಾಗಿ ಹೊರಬರಲಾಗದ ತಹತಹಿಕೆ

ಕಾಮದೆಳೆ ಮೋಹ ಮತ್ಸರದ ಬಲೆ

ಹೆಣೆದು ಸಿಲುಕಿ ಗುದ್ದಿ ಒದ್ದಾಡಿ

ಬಳಲಿ ಬೆಂದು ಹೋದ ತೆರಣಿ

ತೊಳಲಾಟದ ಕನವರಿಕೆಯ ಕನಸು

ಸಿರಿ ಸುಖದ ಹಳಹಳಿಕೆಯ ಮನಸು

ಮಬ್ಬು ಮುಸುಕಿದ ಹಾದಿಯ ತುದಿ 

ಅಡ್ಡ ಹರಿಯುತಿದೆ ಭವದ ನದಿ

ದಡದಾಚೆ ಕರೆದೊಯ್ಯುವ ಅಂಬಿಗನ ದೋಣಿ

ಚೌಡಯ್ಯನಿಲ್ಲದೆ ಎಲ್ಲೆಲ್ಲೂ ಸೋರುವ 

ತೂತುಗಳ ಖಣಿ

ಎಲ್ಲಿ ಪಯಣದ ಯೋಗ 

ಇಲ್ಲ ಧ್ಯಾನದ ಜಾಗ

ಮಹಾಮಾಯೆಯಾಟ ಭವದ ಚಕ್ರವ್ಯೂಹ

ಸುಲಭ ಹೊರಟ ಅಭಿಮನ್ಯುಗಳಿಗೆ

ದಿಕ್ಕಿಲ್ಲದ ದ್ವಂದ್ವ ಭವಿಗಳಿಗೆ

ದುರಾಸೆ ಮೂಟೆ ಒಂದೆಡೆಗೆ 

ಧುಮ್ಮಿಕ್ಕಿ ಹರಿವ ನದಿ ಇನ್ನೊಂದೆಡೆಗೆ

ತೆರೆಯದ ಭದ್ರ ಬಾಗಿಲು ಮಗದೊಂದೆಡೆಗೆ

ಬಳಲುವುದೊಂದೇ ಕಾಯಕ

ನಿತ್ಯ ಸಂತೆಯ ಮಿಥ್ಯಗಳೊಳಗೆ 

ಸತ್ಯ ಶೋಧನೆಯ ಕುಹಕದಲಿ ಮುಳುಗಿ

ಭೋಗದರಮನೆಯೊಳಗೆ ಝಗಮಗಿಸುವ

ಥಳುಕು ಬಳುಕು

ಗುರಿಯಿಲ್ಲದ ನಾಳೆಗಳ ಕನಸು

ಮುಂದೆ ತೆವಳುವವರಿಲ್ಲ

ಹಿಂದೆ ತಳ್ಳುವವರೇ ಎಲ್ಲ

ಬಾಗಿಲ ಬಳಿ ನಿಂತನರಸ ಬಿಜ್ಜಳ 

ತಪ್ಪಿಸಿಕೊಳ್ಳದಂತೆ ಒಂದೇ ಒಂದು

ಸಾಮ್ರಾಜ್ಯದ ಹುಳ

ಕನಕನ ಕಿಂಡಿಯೇ ಬೆಳಕಿನ ಪಥ

ಸಾಹಸದ ಪಯಣ ದೂರ ಗಾವುದ

ಕಾಣುವುದಾರಿಗೋ ಎಲ್ಲ ಚೀಲ 

ಹೊತ್ತವರೇ

ಸುತ್ತುವುದಲ್ಲಿಯೇ ಗೂಡೊಳಗೆ 

ಸಿರಿಯ ಕೃತಕ ಮಯನರಮನೆಯೊಳಗೆ

ಬಂಧನ ಮುಕ್ತಿ ಬಂಧನ ಮುಕ್ತಿ

ಮಂತ್ರಜಪದ ಮಂಥನ 

ಜಾರುಬೀಳುವುದರೊಳಗೆ

ಜಡತೆಯುರುಳು

ಬತ್ತಿದೊಡಲಲ್ಲಿಯೂ ಚಿಮ್ಮುವ 

ಜೀವನೋತ್ಸಾಹವೇ 

ನೀನೆಷ್ಟು  ಚಿರಂತನ

ಸುಕ್ಕು ಗಟ್ಟಿ ಮಡಿಕೆಗಳೆದ್ದ ಚರ್ಮ

ಕುಂಟುತ್ತಾ ಗುರಿಮುಟ್ಟುವ ಕರ್ಮ

ಜೋತುಬಿದ್ದ ಹುಬ್ಬು ದೃಷ್ಟಿ

ಬೆಂದು ಬಾಗಿ ನಡುಗುವ ಮೈ

ನಿನ್ನ ನೆಲೆಯ ಕಂಡವರೊಮ್ಮೆ 

ತಲೆದೂಗಬೇಕು ಬಾಗಿ 

ಮುನ್ನಡೆಯಬೇಕು

ಜಗದ ಬೆಳಗನೆಬ್ಬಿಸುವ ನೇಸರ 

ಸಂಜೆ ಮರೆತು ಕುಣಿಯಬೇಕು

ನೋಡಿ ಮತ್ತೆ ಬೆಳಗಬೇಕು

ಏನು ಬೆರಗು ಇಲ್ಲ ಕೊರಗು

ಚೈತನ್ಯದ ಜೊತೆಗೂಡಿ 

ಹೊರಟಿಹುದು ಅನಂತದೆಡೆಗೆ


ಸುಕ್ಕಿರದ ಒಡಲುಗಳಲಿ

ಹೊಕ್ಕುಳಿಯಲೇಕೆ ಹಿಂಜರಿಕೆ

ಓ ಜೀವನ ಪ್ರೀತಿಯೇ 

ಮುಪ್ಪರಿಗೊಂಡು ಮುಪ್ಪುಗಳಲಿ

ಆರ್ಭಟಿಸಿ ಮುನ್ನಡೆವಂತೆ

ನರ್ತಿಸುವುದಿಲ್ಲವೇಕೆ 

ಉದಯಕಾಲದ ಯುವಸಸಿಗಳಲಿ

ಆಲಸ್ಯದ ಭೂತವಿಹುದು

ದೇಹವನ್ನೇ ಮನೆಯ ಮಾಡಿ

ಜಡದ ಜೇಡ ಕಟ್ಟಿಹುದು

ಎಚ್ಚರಿಸಿ ಹೊರಗಟ್ಟಿ ತುಳಿದು

ಚೈತನ್ಯದ ನದಿ ಹರಿಸಬಾರದೇಕೆ

ಕನಸು ಬತ್ತಿರುವ ಎದೆಗಳಲಿ

ಉತ್ಸಾಹದ ಚಿಲುಮೆ ಚಿಮ್ಮಿಸಬಾರದೇಕೆ

ಕ್ರಾಂತಿ ಕಿಡಿಯ ಹೊತ್ತಿಸಿ

ಜಾಗೃತಿಯ ಮೂಡಿಸಬಾರದೇಕೆ

ಜಡತೆಯುರುಳಿನಿಂದ ಕೊರಳು

ಪಾರುಮಾಡಬಾರದೇಕೆ

ಕರ್ಮಸಿದ್ಧಾಂತದ ಹಾದಿ 

ತೋರಿ ಕರೆದೊಯ್ಯಬಾರದೇಕೆ

ಏಳಿ ಎದ್ದೇಳಿ ಎಂದರೂ

ಏಳದವರ ನಾಟಕಕೆ 

ತೆರೆ ಎಳೆಯಬಾರದೇಕೆ 

ಜಡತೆಯುರುಳು

ಬತ್ತಿದೊಡಲಲ್ಲಿಯೂ ಚಿಮ್ಮುವ
ಜೀವನೋತ್ಸಾಹವೇ
ನೀನೆಷ್ಟು  ಚಿರಂತನ
ಸುಕ್ಕು ಗಟ್ಟಿ ಮಡಿಕೆಗಳೆದ್ದ ಚರ್ಮ
ಕುಂಟುತ್ತಾ ಗುರಿಮುಟ್ಟುವ ಕರ್ಮ
ಜೋತುಬಿದ್ದ ಹುಬ್ಬು ದೃಷ್ಟಿ
ಬೆಂದು ಬಾಗಿ ನಡುಗುವ ಮೈ
ನಿನ್ನ ನೆಲೆಯ ಕಂಡವರೊಮ್ಮೆ
ತಲೆದೂಗಬೇಕು ಬಾಗಿ
ಮುನ್ನಡೆಯಬೇಕು
ಜಗದ ಬೆಳಗನೆಬ್ಬಿಸುವ ನೇಸರ
ಸಂಜೆ ಮರೆತು ಕುಣಿಯಬೇಕು
ನೋಡಿ ಮತ್ತೆ ಬೆಳಗಬೇಕು
ಏನು ಬೆರಗು ಇಲ್ಲ ಕೊರಗು
ಚೈತನ್ಯದ ಜೊತೆಗೂಡಿ
ಹೊರಟಿಹುದು ಅನಂತದೆಡೆಗೆ
ಸುಕ್ಕಿರದ ಒಡಲುಗಳಲಿ
ಹೊಕ್ಕುಳಿಯಲೇಕೆ ಹಿಂಜರಿಕೆ
ಓ ಜೀವನ ಪ್ರೀತಿಯೇ
ಮುನ್ನಡೆಸುವಂತೆ
ಮುಪ್ಪರಿಗೊಂಡು ಮುಪ್ಪುಗಳಲಿ
ಆರ್ಭಟಿಸಿ ಮುನ್ನಡೆವಂತೆ
ನರ್ತಿಸುವುದಿಲ್ಲವೇಕೆ
ಉದಯಕಾಲದ ಯುವಸಸಿಗಳಲಿ
ಆಲಸ್ಯದ ಭೂತವಿಹುದು
ದೇಹವನ್ನೇ ಮನೆಯ ಮಾಡಿ
ಜಡದ ಜೇಡ ಕಟ್ಟಿಹುದು
ಎಚ್ಚರಿಸಿ ಹೊರಗಟ್ಟಿ ತುಳಿದು
ಚೈತನ್ಯದ ನದಿ ಹರಿಸಬಾರದೇಕೆ
ಕನಸು ಬತ್ತಿರುವ ಎದೆಗಳಲಿ
ಉತ್ಸಾಹದ ಚಿಲುಮೆ ಚಿಮ್ಮಿಸಬಾರದೇಕೆ
ಕ್ರಾಂತಿ ಕಿಡಿಯ ಹೊತ್ತಿಸಿ
ಜಾಗೃತಿಯ ಮೂಡಿಸಬಾರದೇಕೆ
ಜಡತೆಯುರುಳಿನಿಂದ ಕೊರಳು
ಪಾರುಮಾಡಬಾರದೇಕೆ
ಕರ್ಮಸಿದ್ಧಾಂತದ ಹಾದಿ
ತೋರಿ ಕರೆದೊಯ್ಯಬಾರದೇಕೆ
ಏಳಿ ಎದ್ದೇಳಿ ಎಂದರೂ
ಏಳದವರ ನಾಟಕಕೆ
ತೆರೆ ಎಳೆಯಬಾರದೇಕೆ
x