ಅನಭಿಷಕ್ತ ಕೊರೊನಾ...

ಅನಭಿಷಕ್ತ ಕೊರೊನಾ...

ನಿನಗಿಲ್ಲ ದೇಶ ಮತ ಭೇದಗಳ ಸುಳಿ

ಮಾನವ ದೇಹವೇ ನೀ‌ ಬದುಕುವ ಕುಳಿ

ಕುಳಿತು ಹರಿಸುತ್ತಿರುವೆ ರಕ್ತಪಾತದ ಹೊಳಿ

ಅರಸಿ ಸಮಾಧಿ ಮಾಡುವ ನಿನ್ನದೆಂತಹ ಕಳಕಳಿ!

ಜೀವಗಳೇ ನೀನಾಡುವ ಚದುರಂಗದ ಕಾಯಿ

ಅದೆಷ್ಟು ಆಳ ಜಗ ನುಂಗುವ ನಿನ್ನ ಬಾಯಿ

ವಿಶ್ವವನೇ ಬೆಚ್ಚಿಸಿದ ನೀನಲ್ಲವೆ ಮಹಾಮಾಯಿ

ಲೆಕ್ಕಕೂ ಸಿಗುತಿಲ್ಲ ನಿನಗೆ ಯಾರು ಉತ್ತರದಾಯಿ!

ಬಹಿರಂಗದಿ ನಿರ್ಜೀವ ನೀರವ ನೀ ಶೂನ್ಯ 

ಅಂತರಂಗದಿ ನಿನ್ನಾಟ ಜೀವಂತಿಕೆ ಧನ್ಯ

ಅಸ್ಮಿತೆಯೇ ನಿನ್ನದು ಒಳಹೊಗುವ ಜೀವಜನ್ಯ

ರೋಗಾಣುಗಳಲ್ಲೇ ಭಯಂಕರ ನೀ ಅನನ್ಯ!

ಹಾದಿ ಬೀದಿ ಸಂತೆ ಜಾತ್ರೆಗಳೆಲ್ಲವೂ ಖಾಲಿ 

ನೋವು ಪ್ರಾಣ ಹರಣ ನೀ ಕೇಳುವ ದಿನದ ಕೂಲಿ

ಉಡುಗಿ ಹೋಯಿತಲ್ಲ‌‌ ಮೆರೆವ ಮಾನವನ ಡೌಲಿ

ಬೆಳೆಯಿತಲ್ಲ ರಸ್ತೆ ತುಂಬ ಸ್ಮಶಾನ ಮುಳ್ಳುಗಳ ಜಾಲಿ!

ಅಧ್ಯಕ್ಷ ಪ್ರಧಾನ ಅಮಾತ್ಯರ ಕೋಟೆ ಗಡಗಡ

ಭುವನದಲ್ಲಿ ನಿನ್ನದೇ ಮೆರವಣಿಗೆಯ ಜಂಜಡ

ಮೆರೆಯಲಿಷ್ಟು ನೀನು ಯಾರಿರುವರು ಸಂಗಡ

ಮನುಜರನ್ನೇ ನಡುಗಿಸುವ ನೀನಲ್ಲವೇ ನಿಜಸದೃಢ!