ಮೋಹನ ಮುರಳಿ...

ಯಾವ ಮೋಹನ ಮುರಳಿ ಕರೆಯಿತೊ

ತೆರಳಿದಿರಿ ವಿರಮಿಸದೆ ಹೋರಾಡಿ

ಹಾಡಿ ಭೂಮಿಗೀತ ವರ್ಧಮಾನ

ಮೀರುತ ಈ ನೆಲದ ಗೀಳು

ನೋಡಿ ಆಗಸ ತಾರೆಗಳ ಬಾಳು

ಅಂತರಂಗದಿ ಬಹಿರಂಗ ಹುಡುಕಿ

ಹುತ್ತಗಟ್ಟಿದ ಚಿತ್ತದೊಳಗೆ ಬೆದಕಿ

ಭಾವ ಭಾವಗಳ ಬೆಸುಗೆ ಹಾಕಿ

ಶೋಧಿಸಿದಿರಿ ಚಿತ್ತಸುಳಿಗಳ ಹೆಕ್ಕಿ

ಇರುವುದೆಲ್ಲವ ಬಿಡದೆ ತಬ್ಬಿ

ಇರದುದರೆಡೆಗೆ ಬಯಸಿ ಹಬ್ಬಿ

ಆತ್ಮಾವಲೋಕನ ಬೆಳಕಿನಿಂದುಬ್ಬಿ

ಎಚ್ಚರಿಸಿದಿರಿ ತಲ್ಲಣಗಳ ತಬ್ಬಿ

ಜಗದ ಜಂಜಡಗಳ ಮಧ್ಯೆ ತೂರಿ

ಸ್ನೇಹ ಪ್ರೀತಿಗಳ ಅರಸಿ ಮೀರಿ

ಉದಾತ್ತದ ಆಕಾಶದೀಪ ತೋರಿ

ಏಳಬೇಕೆಂದಿರಿ ಕನಸುಗಳಿಂದ ಜಾರಿ

ಬತ್ತಲಾರದ ಕಾವ್ಯಗಂಗೆ ಹರಿಸಿ 

ವಿಧಿಗೆ ಸೆಡ್ಡು ಹೊಡೆದು ಮಣಿಸಿ

ಭಾವಗಳ ಹಾಡಿನಿಂದ ತಣಿಸಿ

ನಲಿದಿರಿ ಆನಂದದ ಬನಿ ತೋರಿಸಿ