ಹೆಗಲ ಭಾರ

ಹೆಗಲ ಭಾರ

ನಾನು ಎಂಬುದೊಂದು

ಹೊರಲಾರದ ಮಣಭಾರ

ಜಾಗ ಸಿಕ್ಕಲ್ಲಿ ಇಣುಕುವುದು

ಕೈಚಾಚಿ ಜನಸಂದಣಿಗಳ ಮಧ್ಯೆ

ಜಗತ್ತನ್ನೇ ಗೆಲ್ಲಬೇಕೆಂದರೂ

ಹೆಣವಾದ ಭಾರದಿಂದ

ಕುಗ್ಗುತಿದೆ ಈ ಹೆಗಲು

ಹಗುರವಾದೀತು ಎಂದು ಈ ಹೊರೆ

ಕಾಯುತಿರುವೆ ನಿಟ್ಟುಸಿರಿಗಾಗಿ

ಬಿಟ್ಟು ತೊಲಗೆಂದರೂ

ವಿಕ್ರಮನ ಈ ಭೂತ

ರಹಸ್ಯಗಳ ಪ್ರಶ್ನೆ ಕೇಳಿ ಕೇಳಿ

ನೆಪ ಹೊತ್ತು ಜೋತು ಬಿದ್ದಿದೆ

ಬೆಂಬಿಡದೆ ಬೆನ್ನೇರಿದೆ

ಸಾಧನೆಗೆ ಶರಾ ಬರೆದು

ಪತನಕೆ ಬೆನ್ನು ತೋರಿ

ಬೀಗುತಲೆ ಕಾಡುತಿದೆ ಗುಳ್ಳೆ ನರಿ

ದಿಗಂತದಿಂದ ಎದ್ದು ಬಂದು

ಮಧ್ಯೆ ನಿಲ್ಲುತಿದೆ ಹೇಳದೆ ಈ ಪರಿ

ಈ ಜಗಕೆ ನಾ ಕಾರಣ

ಈ ಸುಖಕೆ ನಾ ಧಾರಣ

ಗೆಲುವಿಗಂತೂ ನಾ ಭೂಷಣ

ಎಂದಂದೇ ಹಪಹಪಿಸಿ

ನಂಬಿಸಿ ಹಾತೊರೆದಿದೆ

ವ್ಯಕ್ತಿತ್ವದ ಬಲಿಗಾಗಿ

ಸ್ವರ್ಗದ ಮಡಿಲಿಗೆ

ನಾ ಹೋದರೆ ಹೋದೇನು

ಎಂದರವರು ದಾಸರು

ಭಯಂಕರದ ಈ ಭವದಿಂದ

ನಾ ಹೇಗೆ ಹೋಗುವುದು

ಅರಿಯುತಿಲ್ಲ ಆಳುತಿಹುದು

ಇಳಿಸಿದರೂ ಭಾರವದು

ಕಾಲಿಗಾದರೂ ತೊಡರುವುದು

ಬಿಟ್ಟನೆಂದರೂ ಬಿಡದೀ ಮಾಯೆ

ಅಷ್ಟಪದಿಯ ಬಾಹುಗಳ

ಬಿಡದ ಗಟ್ಟಿ ಹಿಡಿತವದು