ಆಗಸ್ತ್ಯ ತೀರ್ಥ

ನಯನ ಮನೋಹರ ಮಣಿ ಮುಕುಟ

ವಾತಾಪಿಗೊದಗಿದ ರಜತ ಕಿರೀಟ

ಬನಶಂಕರಿಯ ಬನದ ರನ್ನಗನ್ನಡಿ

ಪುಲಿಕೇಶಿಯು ಕಂಡ ಸಲಿಲ  ದರ್ಪಣ

ಆಹಾ ಚೈತನ್ಯದ ಸಿರಿ ಅಗಸ್ತ್ಯ  ತೀರ್ಥ

ಶಿಲಾಲತೆಗಳು ತಬ್ಬಿದ ಮೋಹ  ಪದಾರ್ಥ

ಕಣ್ಣುಕ್ಕುವುದು ಕಂಡು ಸೊಬಗಿನ ಮೊನಚು

ಹಿಮ ಹಾಕಿದೆ ರಸಿಕರ ಎದೆಗೆ ಹೊಂಚು

ಧನ್ಯವೋ ಧನ್ಯ ಕಂಡ ಜೀವವೇ ಗಣ್ಯ

ಚೆಲುವಾಗಿದೆ ಹಸಿರ ಸಿರಿಯ ಅರಣ್ಯ

ಕನ್ಮಡಿ ಕಂಡ ಭೂತನಾಥನಾದ ಕನ್ಯೆ!

ಅಕ್ಕತಂಗಿಯರೂ ಧುಮುಕುವರಿಲ್ಲಿ 

ದರ್ಪಣ ದೊಳಗಾಗಲು ಶೂನ್ಯ

ಶಿಲೆಯೂ ಮಣಿದಿದೆ ಜಲಗನ್ನಡಿಯ ಕಾಲಿಗೆ ಒರಗಿ

ಕಲೆಯೂ ವಿಸ್ಮಿತ ಸೊಬಗಿನ  ಸುಗ್ಗಿಗೆ ಮರುಗಿ

ಹೊನಲಾಗಿದೆ ಹರುಷ ಹಬ್ಬವೇ ಜರುಗಿ

ಮನವಾಗಿದೆ ಮಯೂರಿ ಕುಣಿಯುತ ಕರಗಿ

ತೀರ್ಥದಲೆಯ ಮೇಲೆ ರವಿಕೀರ್ತಿಯ ಶಾಸನ

ಕೇಳುತಿದೆ ಇಮ್ಮಡಿ ದಿಗ್ವಿಜಯದ ಸ್ವನ

ತುಳುಕಿತು ಎದೆಯಲಿ ನೆಲದ ಅಭಿಮಾನ

ಮೈದುಂಬಿದ ಸರಸಿಗಿದೋ ಕಾವ್ಯ ನಮನ